ഇലക്ട്രോണിക്‌സ് ആന്‍ഡ് കമ്യൂണിക്കേഷന്‍ എന്‍ജിനിയറിങ് ബി.ടെക്. കഴിഞ്ഞ് കേരളത്തില്‍ ബി.എഡിന് പ്രവേശനം കിട്ടുമോ? എങ്കില്‍ നടപടിക്രമം എന്താണ്? -അന്‍ഖിത, ആലപ്പുഴ
കോഴിക്കോട് സര്‍വകലാശാലയില്‍ എന്‍ജിനിയറിങ് ബിരുദധാരികളെ വ്യവസ്ഥകള്‍ക്കു വിധേയമായി ബി.എഡ്. പ്രവേശനത്തിന് പരിഗണിക്കുന്നുണ്ട്. കുറഞ്ഞത് 55 ശതമാനം മാര്‍ക്കോടെ ബി.ഇ./ബി.ടെക്. ബിരുദം നേടിയവര്‍ക്ക് മാത്തമാറ്റിക്‌സ്, ഫിസിക്കല്‍ സയന്‍സസ് എന്നീ ബി.എഡ്. പ്രോഗാം പ്രവേശനത്തിന് അപേക്ഷിക്കാം. പ്രവേശന പ്രക്രിയയ്ക്കുള്ള റാങ്ക് പട്ടിക തയ്യാറാക്കുമ്പോള്‍, ബി.എസ്‌സി. സ്ട്രീംകാരെ റാങ്ക് ചെയ്തശേഷമേ ബി.ഇ./ബി.ടെക്. ബിരുദധാരികളെ റാങ്ക് ചെയ്യുകയുള്ളൂ.
റാങ്കിങ്ങിനായി ബി.ഇ./ബി.ടെക്. മൊത്തം മാര്‍ക്ക് മാത്രമേ പരിഗണിക്കുകയുള്ളൂ. ഒരു തരത്തിലുള്ള വെയ്‌റ്റേജും കിട്ടില്ല. സര്‍വകലാശാലയാണ് ഇതു സംബന്ധിച്ചുള്ള വിജ്ഞാപനം പുറപ്പെടുവിക്കുന്നത്. വിശദവിവരങ്ങള്‍ പോസ്പക്ടസില്‍ ലഭിക്കും.
കേരള, മഹാത്മാഗാന്ധി, കണ്ണൂര്‍ സര്‍വകലാശാലകള്‍ ബി.ഇ./ബി.ടെക്. യോഗ്യതയുള്ളവരെ ബി.എഡ്. പ്രവേശനത്തിന് പരിഗണിക്കുന്നില്ല. കേരളത്തിനു പുറത്ത് പഠിക്കാന്‍ താത്പര്യമുണ്ടെങ്കില്‍ എന്‍.സി.ഇ.ആര്‍.ടി.യുടെ കീഴിലുള്ള റീജണല്‍ ഇന്‍സ്റ്റിറ്റ്യൂട്ട് ഓഫ് എജ്യുക്കേഷന്‍ (ആര്‍.ഐ.ഇ.), മൈസൂരു കാമ്പസില്‍ നടത്തുന്ന ബി.എഡ്. പ്രോഗ്രാം പ്രവേശനത്തിന് എന്‍ജിനിയറിങ് ബിരുദധാരികളെ പരിഗണിക്കുന്നുണ്ട്. 50 ശതമാനം മാര്‍ക്ക് വേണം. വിവരങ്ങള്‍ക്ക്: http://cee.ncert.gov.in/
ആസ്‌ക് എക്‌സ്‌പേര്‍ട്ടിലേക്ക് ചോദ്യങ്ങളയക്കാന്‍ സന്ദര്‍ശിക്കുക: english.mathrubhumi.com/education/help-desk/ask-expert
Content Highlights: BEd Admission Criteria for Engineering Graduates
.jpg?$p=6b2ea1a&f=1x1&w=100&q=0.8)
