നേപ്പിയര്: ബംഗ്ലാദേശിനെതിരായ ആദ്യ ഏകദിനത്തില് ന്യൂസീലന്ഡ് വിജയിച്ചപ്പോള് കളിയിലെ താരമായത് മാര്ട്ടിന് ഗുപ്റ്റിലാണ്. 103 പന്തില് സെഞ്ചുറി പൂര്ത്തിയാക്കിയ ഗുപ്റ്റില് 116 പന്തില് 117 റണ്സെടുത്ത് പുറത്താകാതെ നിന്നു. 233 റണ്സ് വിജയലക്ഷ്യവുമായി ഇറങ്ങിയ ന്യൂസീലന്ഡിന്റെ വിജയത്തില് ഈ സെഞ്ചുറി ഇന്നിങ്സ് നിര്ണായകമാകുകയും ചെയ്തു.
എന്നാല് ഈ മാന് ഓഫ് ദ മാച്ച് പുരസ്കാരം വാങ്ങിയശേഷം ഗുപ്റ്റിലിനെ കാത്ത് മറ്റൊരു 'സര്പ്രൈസ്' ഉണ്ടായിരുന്നു. സമ്മാനദാനച്ചടങ്ങിലെ അവതാരക ഗുപ്റ്റിലിന്റെ ഭാര്യ ലോറ മക്ഗോള്ഡ്രിക്കായിരുന്നു. ലോറ ചോദ്യങ്ങള് ചോദിച്ചപ്പോള് തികച്ചും പ്രൊഫഷണലായിട്ടായിരുന്നു ഗുപ്റ്റിലിന്റെ ഉത്തരങ്ങള്.
എട്ടു വിക്കറ്റിനായിരുന്നു ന്യൂസീലന്ഡിന്റെ വിജയം. ഇന്ത്യക്കെതിരായ ട്വന്റി-20 പരമ്പര വിജയത്തിന് ശേഷം ന്യൂസീലന്ഡിന്റെ അടുത്ത മത്സരമായിരുന്നു ബംഗ്ലാദേശിനെതിരേ നടന്നത്. വിജയത്തോടെ മൂന്ന് ഏകദിനങ്ങളടങ്ങിയ പരമ്പരയില് ആതിഥേയര് 1-0ത്തിന് ലീഡെടുത്തു.
Content Highlights: New Zealand batsman Martin Guptill interviewed by wife Laura McGoldrick