ഫിഫ അണ്ടര്‍-17 ലോകകപ്പിന്റെ പ്രീക്വാര്‍ട്ടറില്‍ ഹോണ്‍ഡുറസിനെ നേരിടുമ്പോള്‍ വിജയത്തെപ്പറ്റി ബ്രസീലിന് തരിമ്പുപോലും സംശയമില്ല. മറുവശത്ത് പോരാട്ടവീര്യത്തോടെയാണ് അണിനിരക്കുന്നതെങ്കിലും ഹോണ്‍ഡുറസിന്റെ വിജയത്തെപ്പറ്റി അവരുടെ ആരാധകര്‍ക്കുപോലും അധികം പ്രതീക്ഷകളൊന്നുമില്ല.
പക്ഷേ, ഇത് ഫുട്ബോളാണ്... ബ്രസീലിനെ വീഴ്ത്തിയാല്‍ ഹോണ്‍ഡുറസിനെ കാത്തിരിക്കുന്നത് ലോകഫുട്ബോളിലെതന്നെ വലിയ അട്ടിമറികളിലൊന്നാകും. പ്രാഥമികറൗണ്ടിലെ മൂന്നു മത്സരങ്ങളും ജയിച്ച് ബ്രസീല്‍ പ്രീക്വാര്‍ട്ടര്‍ പോരാട്ടത്തിനെത്തുമ്പോള്‍ ന്യൂ കാലിഡോണിയയ്ക്കെതിരേ നേടിയ ഏകവിജയത്തിന്റെ പിന്‍ബലത്തിലാണ് ഹോണ്‍ഡുറസ് പ്രീക്വാര്‍ട്ടര്‍ ടിക്കറ്റ് തരപ്പെടുത്തിയത്. ജവാഹര്‍ലാല്‍ നെഹ്‌റു അന്താരാഷ്ട്ര സ്റ്റേഡിയത്തില്‍ ബുധനാഴ്ച രാത്രി എട്ടുമണിക്കാണ് കിക്കോഫ്.
ടോപ് ഗിയറില്‍ ബ്രസീല്‍
യൂറോപ്യന്‍ ചാമ്പ്യന്‍മാരായ സ്പെയിനിനെയടക്കം വീഴ്ത്തി ഗ്രൂപ്പ് ചാമ്പ്യന്‍മാരായുള്ള വരവ്... വിനീഷ്യസ് ജൂനിയര്‍ എന്ന സൂപ്പര്‍ താരത്തിന്റെ അഭാവം അല്പംപോലും പ്രകടിപ്പിക്കാത്തവിധം ഫോമിലുള്ള മുന്നേറ്റനിര... സ്പെയിനിനെതിരായ സെല്‍ഫ് ഗോളൊഴിച്ചാല്‍ ഒരിക്കല്‍പ്പോലും തുളവീഴാത്ത പ്രതിരോധക്കോട്ട. കൗമാര ലോകകപ്പിന്റെ ക്വാര്‍ട്ടര്‍ ഫൈനല്‍ ബര്‍ത്ത് തേടി ബുധനാഴ്ച കളത്തിലിറങ്ങുമ്പോള്‍ ആത്മവിശ്വാസത്തിന്റെ ടോപ് ഗിയറിലാണ് ബ്രസീല്‍. കൊച്ചിയില്‍ കളിക്കാന്‍ കഴിയുന്നതിന്റെ സന്തോഷമാണ് ചൊവ്വാഴ്ച സ്റ്റേഡിയത്തില്‍വെച്ച് കണ്ടുമുട്ടുമ്പോള്‍ ബ്രസീല്‍ കോച്ച് കാര്‍ലോസ് അമേദ്യോ പങ്കുവെച്ചത്.
പൗളീന്യോയും ലിങ്കണും
മൂന്നു ഗോളടിച്ച ലിങ്കണും രണ്ടുഗോളടിച്ച പൗളീന്യോയും... ഹോണ്‍ഡുറസിനെതിരെയും കാര്‍ലോസിന്റെ ആവനാഴിയിലെ വജ്രായുധങ്ങള്‍ മാറാനിടയില്ല. ഇഷ്ടശൈലിയായ 4-3-3 എന്ന വിന്യാസത്തില്‍ കാര്‍ലോസ് ബ്രസീലിനെ അണിനിരത്തുമ്പോള്‍ മധ്യത്തില്‍ പൗളീന്യോയും ഇടംവലമായി ലിങ്കണും ബ്രെണ്ണറും ഉണ്ടാകുമെന്നുറപ്പാണ്. പ്ലേമേക്കറുടെ റോളില്‍ അലന്‍ സൂസ എത്തുന്നതോടെ ബ്രസീലിയന്‍ കളിയൊഴുക്കിനെപ്പറ്റി ആശങ്കപ്പെടേണ്ടിവരില്ല. ക്യാപ്റ്റന്‍ വിറ്റാവോയുടെ നേതൃത്വത്തിലുള്ള പ്രതിരോധക്കോട്ടയും അചഞ്ചലം.
പോരാടാന്‍ ഹോണ്‍ഡുറസ്
ഫ്രാന്‍സിനോട് അഞ്ചുഗോളുകളും ജപ്പാനോട് ആറുഗോളുകളും വാങ്ങി കൊച്ചിയിലെത്തിയ ഹോണ്‍ഡുറസ് നിര്‍ണായക പോരാട്ടത്തിനിറങ്ങുമ്പോള്‍ വലിയ അദ്ഭുതമൊന്നും പ്രതീക്ഷിക്കുന്നില്ല. തോല്‍വിയിലും ഫ്രാന്‍സിനെതിരെയും ജപ്പാനെതിരെയും ഗോളടിച്ച ഹോണ്‍ഡുറസ് ബ്രസീലിനെതിരെയും പരമാവധി പോരാട്ടമെന്ന നയമാണ് മുന്നോട്ടുവയ്ക്കുന്നത്.
.jpg?$p=9815a1a&f=1x1&w=100&q=0.8)
