Photo: twitter.com|IndSuperLeague
വാസ്‌കോ:ഇന്ത്യന്‍ സൂപ്പര്‍ ലീഗിലെ ഒഡിഷ എഫ്.സി-ചെന്നൈയിന്‍ എഫ്.സി മത്സരം സമനിലയില്‍. ഇരുടീമുകള്‍ക്കും ഗോള്‍ നേടാനായില്ല. കൃത്യമായി പന്ത് വലയിലെത്തിക്കാന്‍ പോന്ന താരങ്ങളുടെ കുറവ് ഇന്നത്തെ മത്സരത്തില്‍ പ്രകടമായിരുന്നു.
ഒഡിഷയെക്കാളും മികച്ച പ്രകടനം കാഴ്ചവെച്ചത് ചെന്നൈയിന്‍ ആയിരുന്നു. ചെന്നൈയുടെ ഗോളെന്നുറച്ച മൂന്നോളം ഷോട്ടുകളാണ് നിര്‍ഭാഗ്യം മൂലം വഴിമാറിപ്പോയത്. ചെന്നൈയുടെ ചങ്‌തെ മത്സരത്തിലെ ഹീറോ ഓഫ് ദ മാച്ച് പുരസ്‌കാരം സ്വന്തമാക്കി.
മത്സരം തുടങ്ങി ആദ്യ മിനിട്ടില്‍ തന്നെ ചെന്നൈയിന്‍ മികച്ച അവസരം സൃഷ്ടിച്ചു. പന്തുമായി മുന്നേറിയ റഹീം അലി ബോക്‌സിനകത്ത് എത്തിയെങ്കിലും ഷോട്ടുതിര്‍ക്കുന്നതിന് മുന്‍പ് പന്ത് ഒഡിഷയുടെ ഗോള്‍കീപ്പര്‍ അര്‍ഷ്ദീപ് പിടിച്ചെടുത്തു.
പിന്നാലെ ഒഡിഷയും ആക്രമിച്ച് കളിച്ചതോടെ മത്സരം ആവേശത്തിലായി. ഇരുടീമുകളും ആദ്യ മിനിട്ട് തൊട്ട് ഗോള്‍ നേടാനാണ് ശ്രമിച്ചത്. ചെന്നൈയിന്‍ കുടുതല്‍ സമയം പന്ത് കൈവശം വെച്ചാണ് കളിച്ചത്. 13-ാം മിനിട്ടില്‍ ചെന്നൈയുടെ ചങ്‌തെ ഒരു ലോങ്‌റേഞ്ചര്‍ എടുത്തെങ്കിലും പന്ത് പുറത്തേക്ക് പോയി.
കളി പുരോഗമിക്കവേ ചെന്നൈ കൂടുതല്‍ പിടിമുറുക്കി. നിരന്തരം ഗോള്‍ നേടാനായി ടീം ശ്രമിച്ചുകൊണ്ടേയിരുന്നു. ചെന്നൈ കൃത്യമായി പന്ത് ബോക്‌സിനടുത്തേക്ക് കൊണ്ടുവരുന്നുണ്ടെങ്കിലും അത് ലക്ഷ്യത്തിലെത്താന്‍ താരങ്ങള്‍ക്ക് കഴിഞ്ഞില്ല. മിക്കവരും ലോങ്‌റേഞ്ചറുകളാണ് പയറ്റാന്‍ ശ്രമിച്ചത്.
42-ാം മിനിട്ടില്‍ ഒഡിഷയുടെ ഡീഗോ മൗറീഷ്യോ വല ചലിപ്പിച്ചെങ്കിലും റഫറി അത് ഓഫ്‌സൈഡ് വിളിച്ചു.
രണ്ടാം പകുതിയിലും ചെന്നൈ തന്നെയാണ് ആദ്യ മിനിട്ടുകളില്‍ ആക്രമിച്ച് കളിച്ചത്. ഒഡിഷയുടെ മുന്നേറ്റനിരയ്ക്ക് പന്തെത്തിക്കാന്‍ മധ്യനിരയ്ക്ക് കഴിയാതെപോയി. ബ്ലാസ്‌റ്റേഴ്‌സിനെതിരേ കളിച്ച ഒഡിഷയുടെ ഫോമിന്റെ പത്തിലൊരംശം പോലും ഇന്ന് പുറത്തെടുക്കാന്‍ ടീമിന് സാധിച്ചില്ല.
രണ്ടാം പകുതിയിലെ ആദ്യ അവസരം 69-ാം മിനിട്ടിലാണ് പിറന്നത്. ചെന്നൈയില്‍ പകരക്കാരനായി ഇറങ്ങിയ ഇസ്മയില്‍ ഇസ്മയ്ക്കാണ് അവസരം ലഭിച്ചത്. പക്ഷേ കിക്ക് ക്രോസ്ബാറിന് മുകളിലൂടെ പറന്നു. തൊട്ടുപിന്നാലെ ചെന്നൈയിന്റെ റഹീം അലിയ്ക്ക് ഒരു സുവര്‍ണാവസരം ലഭിച്ചു. പക്ഷേ നിര്‍ഭാഗ്യവശാല്‍ താരത്തിന്റെ കിക്ക് ഒഡിഷ പോസ്റ്റില്‍ തട്ടിത്തെറിച്ചു.
പകരക്കാരെകൊണ്ടുവന്നശേഷം ഇരുടീമുകളും നന്നായി കളിച്ചെങ്കിലും ഗോള്‍ മാത്രം നേടാന്‍ സാധിച്ചില്ല.
Content Highlights: ISL 2020-2021 Chennaiyin FC vs Odisha FC Live Coverage
.jpg?$p=8a7b7b1&f=1x1&w=100&q=0.8)
.jpg?$p=8384990&f=1x1&w=100&q=0.8)
