പ്രേഗ്: 400 മീറ്ററിലെ സ്വന്തം ദേശീയ റെക്കോര്‍ഡ് മറികടന്ന് ഇന്ത്യയുടെ ദീര്‍ഘദൂര ഓട്ടക്കാരനും മലയാളിയുമായ മുഹമ്മദ് അനസ്. ചെക്ക് റിപ്പബ്ലിക്കില്‍ ശനിയാഴ്ച നടന്ന അന്താരാഷ്ട്ര മീറ്റില്‍ 45.24 സെക്കന്‍ഡില്‍ 400 മീറ്റര്‍ മറികടന്ന് അനസ് സ്വര്‍ണമണിഞ്ഞു.
മലയാളിയായ കുഞ്ഞുമുഹമ്മദ് രണ്ടാ സ്ഥാനവും (46.68 സെക്കന്‍ഡ്) കര്‍ണാടകയില്‍ നിന്നുള്ള സുരേഷ് ജീവന്‍ (46.98 സെക്കന്‍ഡ്) മൂന്നാം സ്ഥാനവും നേടി. മറ്റൊരു മലയാളി താരമായ ജിത്തുബേബിയാണ് (47.13 സെക്കന്‍ഡ്) നാലാമതെത്തിയത്.
ഈ വര്‍ഷമാദ്യം ഓസ്‌ട്രേലിയയിലെ ഗോള്‍ഡ് കോസ്റ്റില്‍ നടന്ന കോമണ്‍വെല്‍ത്ത് ഗെയിംസില്‍ 45.31 സെക്കന്‍ഡില്‍ ഫിനിഷ് ചെയ്തതായിരുന്നു അനസിന്റെ ഇതിനു മുന്‍പത്തെ മികച്ച പ്രകടനം. അന്ന് നിര്‍ഭാഗ്യം കൊണ്ടാണ് അനസിന് വെങ്കലം നഷ്ടമായത്. നാലാമതായാണ് അനസ് ഫിനിഷ് ചെയ്തത്.
സ്വര്‍ണ നേട്ടത്തിനു പിന്നാലെ അനസിന് ആശംസകളുമായി ഇന്ത്യന്‍ അത്‌ലറ്റിക്‌സ് ഫെഡറേഷന്‍ രംഗത്തെത്തി. അനസിനും പരിശീലകന്‍ ഗാലിന ബുഖാറിനയ്ക്കും അത്‌ലറ്റിക്‌സ് ഫെഡറേഷന്‍ ആശംസയറിയിച്ചിട്ടുണ്ട്. ഇതേ ഇനത്തില്‍ വനിതാ വിഭാഗത്തില്‍ ഇന്ത്യന്‍ താരം എം.ആര്‍ പൂവമ്മയും സ്വര്‍ണം നേടിയിട്ടുണ്ട്. 200 മീറ്ററില്‍ ഇന്ത്യയുടെ രാജീവ് അരോക്യ വെങ്കലവും കരസ്ഥമാക്കി.
കൊല്ലം നിലമേല്‍ സ്വദേശിയായ അനസ് ഇത് രണ്ടാം തവണയാണ് സ്വന്തം പേരിലുള്ള ദേശീയ റെക്കോര്‍ഡ് തിരുത്തുന്നത്. മില്‍ഖ സിങ്ങിന് ശേഷം ആദ്യമായി കോമണ്‍വെല്‍ത്ത് ഗെയിംസ് ഫൈനലില്‍ പ്രവേശിച്ച ഇന്ത്യന്‍ താരമാണ് അനസ്. 50 വര്‍ഷത്തിനു ശേഷമായിരുന്നു 400 മീറ്ററില്‍ ഒരു ഇന്ത്യന്‍ താരത്തിന്റെ ഫൈനല്‍ പ്രവേശനം.
Content Highlights: muhammed anas betters own 400 meter indian record in czech republic
