ബ്യൂണസ് ഐറിസ്: അര്‍ജന്റീനയുടെ സൂപ്പര്‍ താരം ലയണല്‍ മെസ്സി ദേശീയ ടീമിലേക്ക് തിരിച്ചെത്തുന്നു. അര്‍ജന്റീനയുടെ പുതിയ പരിശീലകന്‍ എഡ്ഗാര്‍ഡൊ ബൗസയുമായി നടത്തിയ കൂടിക്കാഴ്ച്ചക്കിടയില്‍ മെസ്സി തിരിച്ചു വരാന്‍ താത്പര്യം പ്രകടിപ്പിച്ചതായാണ് റിപ്പോര്‍ട്ടുകള്‍.
സപ്തംബറില്‍ നടക്കുന്ന ലോകകപ്പ് യോഗ്യതാ മത്സരത്തിനുള്ള ടീമിനെ പ്രഖ്യാപിക്കുന്നതിന് മുന്നോടിയായാണ് എഡ്ഗാര്‍ഡൊ ബൗസ മെസ്സിയെ ബാഴ്‌സലോണയില്‍ ചെന്നുകണ്ടത്. തിരിച്ചു വരാന്‍ പറഞ്ഞ് മെസ്സിയില്‍ സമ്മര്‍ദ്ദം ചെലുത്തിയിട്ടില്ലെന്നും ഫുട്‌ബോളിനെക്കുറിച്ച് സംസാരിക്കുന്നതിനിടയില്‍ മെസ്സി തിരിച്ചു വരാന്‍ താത്പര്യം പ്രകടിപ്പിച്ചതായും ബൗസ വ്യക്തമാക്കി.
'ദേശീയ ടീമിലേക്ക് തിരിച്ചു വരാന്‍ മെസ്സി ആഗ്രഹിക്കുന്നുവെന്ന കാര്യത്തില്‍ എനിക്ക് ഒരു സംശയവുമില്ല. തിരിച്ചുവരാന്‍ അതിയായി ആഗ്രഹിക്കുന്ന മാനസികാവസ്ഥയിലാണ് മെസ്സിയിപ്പോള്‍' -ബൗസ വ്യക്തമാക്കി. അര്‍ജന്റീനയുടെ ടീമിനെ പ്രഖ്യാപിക്കുന്നതിന് മുമ്പ് മെസ്സിയെ ഒരിക്കല്‍ കൂടി ഫോണില്‍ ബന്ധപ്പെടുമെന്നും ബൗസ പറഞ്ഞു.
കഴിഞ്ഞ മാസം ജെറാര്‍ഡോ മാര്‍ട്ടിനൊ വിരമിച്ചതിനെ തുടര്‍ന്നാണ് ബൗസ അര്‍ജന്റീനയുടെ പുതിയ പരിശീലകനായി ചുമതലയേറ്റത്. ഒളിമ്പിക്‌സ് ഫുട്‌ബോളില്‍ മെസ്സിയില്ലാതെ കളിക്കാനിറങ്ങിയ അര്‍ജന്റീന ഗ്രൂപ്പ് റൗണ്ടില്‍ തന്നെ പുറത്തായിരുന്നു.
കഴിഞ്ഞ കോപ്പ അമേരിക്കയുടെ ഫൈനലില്‍ ചിലിയോട് പരാജയപ്പെട്ടതിനെ തുടര്‍ന്നാണ് മെസ്സി അന്താരാഷ്ട്ര ഫുട്‌ബോളില്‍ നിന്ന് വിരമിച്ചത്. ഫൈനലില്‍ പെനാല്‍റ്റി പുറത്തേക്കടിച്ച് കളഞ്ഞ മെസ്സിക്കെതിരെ വിമര്‍ശനങ്ങള്‍ ഉയര്‍ന്നിരുന്നു. എന്നാല്‍ പിന്നീട് മെസ്സി തിരിച്ചു വരണമെന്ന ആവശ്യവുമായി ഫുട്‌ബോള്‍ ആരാധകര്‍ രംഗത്തെത്തിയിരുന്നു.
.jpg?$p=8a7b7b1&f=1x1&w=100&q=0.8)
.jpg?$p=e1fda36&f=1x1&w=100&q=0.8)
