കോഴിക്കോട്: സംസ്ഥാനത്ത് കോഴിയിറച്ചി വിലയില്‍ അനിയന്ത്രിതമായ വര്‍ധനവ്. ഒരാഴ്ചയ്ക്കിടെ മാത്രം നൂറ് രൂപയോളമാണ് വില വര്‍ധിച്ചത്. 220 രൂപയാണ് കോഴിക്കോട് നടക്കാവിലെ കോഴിമാര്‍ക്കറ്റില്‍ ബുധനാഴ്ചത്തെ വില. ചിലയിടങ്ങളില്‍ 240 രൂപയോളമായിട്ടുണ്ട്.
തമിഴ്‌നാട്ടില്‍ നിന്നായിരുന്നു സംസ്ഥാനത്തിന്റെ വിവിധ ഭാഗങ്ങളിലേക്ക് പ്രധാനമായും കോഴികള്‍ എത്തിക്കൊണ്ടിരുന്നത്. എന്നാല്‍ ഇവിടെ നിന്നുള്ള ചെറുകിട കോഴിഫാമുകളിലെല്ലാം പലതും പൂട്ടിപ്പോയി. ജി.എസ്.ടി നിര്‍ബന്ധമാക്കിയതോടെ തുറക്കാനാവാത്ത അവസ്ഥ വന്നതോടെയാണ് ഇവിടേയുള്ള പല കോഴിഫാമുകളും പൂട്ടിപ്പോയത്. തുടര്‍ന്ന് കഴിഞ്ഞ കുറച്ചുകാലമായി വന്‍കിട കുത്തകകളായിരുന്നു കോഴിവില നിയന്ത്രിച്ചിരുന്നത്.
പ്രളയത്തിന് ശേഷം സംസ്ഥാനത്തെ പല കോഴിഫാമുകളും പൂട്ടിപ്പോയതോടെ ഇത് മുതലെടുക്കാന്‍ അന്യ സംസ്ഥാനത്ത് നിന്നുള്ള കോഴികള്‍ക്ക് വില കൂട്ടിയാണ് കച്ചവടക്കാര്‍ മാര്‍ക്കറ്റിലെത്തിച്ചിരുന്നത്. പ്രളയകാലത്ത് ഫാമുകള്‍ക്ക് നാശമുണ്ടായത് വലിയ സാമ്പത്തിക നഷ്ടമുണ്ടാക്കുകയും ചെയ്തിരുന്നു. പലതും പൂട്ടേണ്ടി വന്നു.
കഴിഞ്ഞ ആഴ്ചവരെ കിലോയ്ക്ക് 120 രൂപയ്ക്കായിരുന്നു കോഴിയിറച്ചി വിറ്റിരുന്നത്. ഒരുപാട് കടകള്‍ ഒരുമിച്ചുള്ളത് കൊണ്ട് വില കുറച്ചായിരുന്നു വിറ്റത്. എന്നാല്‍ 100 രൂപയിലധികം വര്‍ധനവുണ്ടായതോടെ വില കുറച്ചു വില്‍ക്കാന്‍ കഴിയാത്ത അവസ്ഥയാണെന്ന് നടക്കാവിലെ കോഴി വ്യാപാരിയായ അനസ് പറയുന്നു.
വില ഇനിയും കൂടാനാണ് സാധ്യതയെന്നാണ് വ്യാപാരികള്‍ ചൂണ്ടിക്കാട്ടുന്നത്. കോഴിക്ക് വില വര്‍ധിച്ചതോടെ ഹോട്ടല്‍, പാര്‍ട്ടികള്‍ എന്നിവയെല്ലാം നടത്തുന്നവരും പ്രതിസന്ധിയിലായിരിക്കുകയാണ്. വില വര്‍ധിച്ചുവെന്നറിഞ്ഞതോടെ ചിക്കന്‍ വാങ്ങാനെത്തുന്നവര്‍ പലരും കടയിലെത്തി മടങ്ങിപ്പോവുകയോ എല്ലെങ്കില്‍ വാങ്ങുന്ന അളവില്‍ കുറവ് വരുത്തുകയോ ചെയ്യുന്നതായി വ്യാപാരികള്‍ ചൂണ്ടിക്കാട്ടുന്നു. തമിഴ്‌നാട്ടിലെ നാമക്കല്‍, പൊള്ളാച്ചി എന്നിവിടങ്ങളില്‍ നിന്നാണ് സംസ്ഥാനത്തേക്ക് ഏറ്റവും കൂടുതല്‍ കോഴികളെത്തുന്നത്.
RELATED STORIES
.jpg?$p=7621aed&f=1x1&w=100&q=0.8)
.jpg?$p=fc07f96&f=1x1&w=100&q=0.8)
.jpg?$p=818dc93&f=1x1&w=100&q=0.8)
.jpg?$p=d8cbf09&f=1x1&w=100&q=0.8)
IN CASE YOU MISSED IT
