ന്യൂഡല്‍ഹി: തുടര്‍ച്ചയായ 16 ദിവസവും ഇന്ധനവില വര്‍ധിപ്പിച്ചശേഷം ഒരു പൈസ കുറച്ചതിനെ പരിഹസിച്ച് കോണ്‍ഗ്രസ് അധ്യക്ഷന്‍ രാഹുല്‍ഗാന്ധി രംഗത്തെത്തി. ഈ ആശയം തമാശയും ബാലിശവുമായിപ്പോയെന്നും രാഹുല്‍ഗാന്ധി ട്വീറ്റ് ചെയ്തു.
പെട്രോളിന് 60 പൈസയും ഡീസലിന് 59 പൈസയും ബുധനാഴ്ച കുറഞ്ഞതായി എ.എന്‍.ഐ വാര്‍ത്താ ഏജന്‍സി റിപ്പോര്‍ട്ടു ചെയ്തിരുന്നു. എന്നാല്‍, ഒരു പൈസ മാത്രമാണ് കുറഞ്ഞതെന്ന് ഇന്ത്യന്‍ ഓയില്‍ കോര്‍പ്പറേഷന്‍ പിന്നീട് വ്യക്തമാക്കി.
പ്രധാനമന്ത്രി മോദിക്കെതിരെ കഴിഞ്ഞയാഴ്ചയാണ് രാഹുല്‍ ഫ്യുവല്‍ ചലഞ്ചുമായി രംഗത്തെത്തിയത്. ശാരീരിക ക്ഷമത നിലനിര്‍ത്താനുള്ള 'ഹം ഫിറ്റ് ഇന്ത്യാ ചലഞ്ച്' ല്‍ പങ്കെടുത്തശേഷം ക്രിക്കറ്റ് താരം വിരാട് കോലി ചലഞ്ചില്‍ പങ്കെടുക്കാന്‍ പ്രധാനമന്ത്രി മോദിയെയും ക്ഷണിച്ചിരുന്നു. കോലിയുടെ വെല്ലുവിളി ഏറ്റെടുക്കുന്നുവെന്നും ഫിറ്റ്‌നസ് ചലഞ്ച് വീഡിയോ ഉടന്‍തന്നെ പങ്കുവയ്ക്കുമെന്നും മോദി ട്വിറ്ററിലൂടെ വ്യക്തമാക്കിയിരുന്നു.
ഇതിനു പിന്നാലെ പ്രധാനമന്ത്രിയെ വെല്ലുവിളിച്ച് ഫ്യുവല്‍ ചലഞ്ചുമായി രാഹുൽ ഗാന്ധി രംഗത്തെത്തിയിരുന്നു. 'ഇന്ധനവില കുറയ്ക്കൂ. അല്ലാത്തപക്ഷം കോണ്‍ഗ്രസ് രാജ്യവ്യാപക പ്രക്ഷോഭം ആരംഭിക്കുകയും അതിന്റെ ഫലമായി വില കുറയ്ക്കാന്‍ നിങ്ങള്‍ നിര്‍ബന്ധിതനാവുകയും ചെയ്യും. ഫ്യുവല്‍ ചലഞ്ചിനുള്ള മറുപടിക്കായി കാത്തിരിക്കുന്നു' എന്നായിരുന്നു രാഹുല്‍ഗാന്ധിയുടെ ട്വീറ്റ്.
RELATED STORIES
.jpg?$p=aa62323&f=1x1&w=100&q=0.8)
.jpg?$p=2922c1a&f=1x1&w=100&q=0.8)
IN CASE YOU MISSED IT
