അന്ന് ചെവിയിൽ ഈയ്യം ഒഴിച്ചു, ഇന്ന് ആർത്തവത്തിന് അയിത്തം

ഒരു മുതിര്‍ന്ന രാഷ്ട്രീയ നേതാവില്‍ നിന്ന് വീഴാന്‍ പാടില്ലാത്ത ഏറ്റവും സ്ത്രീ വിരുദ്ധമായ പ്രസ്താവനയാണിത്. സ്ത്രീവിരുദ്ധമെന്നതിലുപരി മനുഷ്യത്വ വിരുദ്ധമാണത്. ആര്‍ത്തവമെന്നത് ഒരു ജൈവ പ്രക്രിയ ആണെന്ന് മനസ്സിലാക്കാനുള്ള വകതിരിവ് അദ്ദേഹം കാണിക്കണമായിരുന്നു.

ശുദ്ധി, അശുദ്ധി എന്ന അളവ് കോല് വെച്ചു കൊണ്ടാണോ സ്ത്രീയെ അളക്കേണ്ടത്. സ്ത്രീയില്ലാതെ പ്രപഞ്ചത്തിന് പോലും നിലനില്‍പില്ല. ഒരമ്മയുടെ മകന് പറയാന്‍ കഴിയുന്ന വാക്കുകളാണോ ഇത്. അനാചാരങ്ങളെ ചോദ്യം ചെയ്യാന്‍ രാഷ്ട്രീയ പ്രവര്‍ത്തകര്‍ സുസജ്ജരായിരിക്കേണ്ട കാലഘട്ടത്തിലാണ് ഉത്തരവാദിത്തപ്പെട്ട സ്ഥാനത്ത് നിന്ന് ഒരു നേതാവ് ഇത് പറയുന്നത്. ശ്രീ എം എം ഹസ്സന്‍ പറഞ്ഞ വാക്കുകളെ അംഗീകരിക്കുകയും പിന്തുടരുകയും ചെയ്യുന്ന ഒരു വലിയ വിഭാഗം സ്ത്രീകളുണ്ടെന്നതും ഗൗരവതരമായ കാര്യമാണ്.

ഇത്തരത്തിലുള്ള എന്തെല്ലാം അബദ്ധങ്ങള്‍ നമ്മള്‍ ഓരോ ദിവസം കേള്‍ക്കുകയും കാണുകയും ചെയ്യുന്നു.എളുപ്പത്തില്‍ തള്ളിക്കളയാവുന്നതേയുള്ളൂ ഇവയെല്ലാം.ഇത്തരം അറപ്പുളവാക്കുന്ന സ്ത്രീവിരുദ്ധത, ആഘോഷിക്കപ്പെടാത്ത ഒരു കാലം ദൂരെയല്ല എന്ന് പ്രത്യാശിക്കുന്നു

പുരോഗമന ആശയങ്ങള്‍ പുലര്‍ത്തേണ്ട ഒരാളായിരിക്കണം ഒരു രാഷ്ട്രീയ പ്രവര്‍ത്തകന്‍. അക്കാദമിക് നിലവാരമില്ലെങ്കില്‍ പോലും പലരെയും ജനങ്ങള്‍ തിരഞ്ഞെടുക്കുന്നതും അംഗീകരിക്കുന്നതും മനുഷ്യരുമായി അവര്‍ വെച്ചു പുലര്‍ത്തുന്ന ബന്ധത്തിന്റെ അടിസ്ഥാനത്തിലോ അവരുടെ പുരോഗമനപരമായ നിലപാടുകൊണ്ടോ ആണ്. ഇത്തരത്തിലുള്ള രാഷ്ട്രീയക്കാരുടെ വാക്കുകള്‍ ശ്രദ്ധിക്കുന്ന ഒരുപാട് പേരുണ്ട്. അവര്‍ പ്രസ്താവന നടത്തുമ്പോള്‍ സൂക്ഷിക്കണം. ഇനി അവരുടെ അറിവുകളോ നിലപാടുകളോ പ്രതിലോമകരമാണെങ്കില്‍ പോലും അതിനെക്കുറിച്ച് സംസാരിക്കാതിരിക്കാനുള്ള അച്ചടക്കവും വിവേകവും കാണിക്കണം.

മനുഷ്യനെന്ന ജീവ വംശത്തിന്റെ പ്രത്യുത്പാദന ക്ഷമതയുടെ പ്രതീകമാണ് ആര്‍ത്തവം. സാമാന്യമായ പ്രകൃതി ബോധമെങ്കിലും ഉള്ളവര്‍ ആര്‍ത്തവത്തെ അശുദ്ധിയാക്കി തരംതാഴ്ത്തില്ല. വേദം കേള്‍ക്കുന്ന ശൂദ്രരുടെ ചെവിയില്‍ ഈയ്യം ഒഴിക്കണമെന്ന ഏറ്റവും മോശമായ സവര്‍ണ്ണമൂല്യബോധത്തിന്റെ ആവര്‍ത്തനമാണ് ആര്‍ത്തവ വിലക്കും. ഇത് പറയുന്നവര്‍ക്കാണ് അയിത്തം പ്രഖ്യാപിക്കേണ്ടത്.

സ്ത്രീയുടെ എല്ലാതരത്തിലുമുള്ള പൊതു ഇട പ്രവേശനം പരിഹരിക്കപ്പെടുന്നില്ല. അതിന് ആരാധനാലയങ്ങളാണ് ആക്കം കൂട്ടുന്നത്. ഒരു സ്ത്രീ ശരീരം, മതത്തിന്റെയോ ദൈവത്തിന്റെയോ ദൈവവിശ്വാസത്തിന്റെയോ നിലനില്‍പിന്റെ ആവശ്യകതയാവുന്നതെങ്ങനെയാണ്. മതത്തിന്റെയും ആരാധനാലയങ്ങളുടെയും പവിത്രത കാത്തു സൂക്ഷിക്കുന്നതിനുള്ള ഭാരിച്ച ഉത്തരവാദിത്വം സ്ത്രീ ശരീരത്തിന് മേല്‍ വരികയാണ്. ഇത് അംഗീകരിക്കാന്‍ കഴിയുന്നതല്ല. പുതിയകാല സമൂഹം, മതവും സ്ത്രീ ശരീരവും തമ്മിലുള്ള ബന്ധം പുനരാലോചിച്ചു കഴിഞ്ഞു.

വോട്ടിടാന്‍ പോകേണ്ട ദിവസം ആര്‍ത്തവം വന്നാല്‍ ഞങ്ങള്‍ വീട്ടിലിരിക്കുകയാണോ പുറത്തുപോവുകയാണോ വേണ്ടത്.