ജനം പകരം ചോദിക്കും

അഞ്ചുവർഷത്തെ ഭരണത്തിലൂടെ നാശത്തിലേക്കും അസ്വസ്ഥതയിലേക്കും ദാരിദ്ര്യത്തിലേക്കും കൂപ്പുകുത്തിയ രാജ്യത്തെ വീണ്ടെടുക്കാനും കെടുകാര്യസ്ഥതയും മുഷ്‌ക്കും ചോരക്കൊതിയും അവിവേകവുംമാത്രം കൈമുതലാക്കി കേരളത്തെ തകർക്കുന്ന പിണറായി സർക്കാരിന് താക്കീത് നൽകാനും കിട്ടുന്ന സുവർണാവസരമാണ് തിരഞ്ഞെടുപ്പ്.

കേരളത്തിൽ രാഹുൽ തരംഗമുണ്ട്. അതുകൊണ്ടുതന്നെ എല്ലാ സീറ്റിലും ജയം ഉറപ്പ്. കോൺഗ്രസിന്റെ പ്രകടനപത്രികയിലുള്ള ന്യായ് പദ്ധതിയടക്കമുള്ളവ ജനം അംഗീകരിച്ചു കഴിഞ്ഞു. പ്രകടനപത്രികയിലുള്ളത് ജനങ്ങളുടെ താത്പര്യംമാത്രമാണ്. അതിനാൽ യു.ഡി.എഫിന് വലിയ ജയമുണ്ടാകും ഇത്തവണ.

വർഗീയചേരിതിരിവിന് ശ്രമിച്ചു

ഭരണനേട്ടം പറയാനൊന്നും മോദിയും ബി.ജെ.പി. അധ്യക്ഷൻ അമിത്ഷായും മിനക്കെടുന്നില്ല. പകരം അവർ കേരളത്തിലടക്കം വർഗീയത പ്രചരിപ്പിച്ച് ചേരിതിരിവിന് ശ്രമിക്കുകയാണ്. ഇതോടെ മതന്യൂനപക്ഷങ്ങൾക്ക് ആശങ്കയേറി.ഹിന്ദുത്വത്തിന്റെപേരിൽ ജനത്തെ കബളിപ്പിച്ച് വോട്ടുതട്ടാനുള്ള ശ്രമമാണ് ബി.ജെ.പി. നടത്തിയത്. മതനിരപേക്ഷതയെ ദുർബലപ്പെടുത്തി, ജനങ്ങളെ പല തട്ടിലാക്കി. വർഗീയ വികാരം വളർത്താനുള്ള ശ്രമത്തെ ജനം തിരിച്ചറിഞ്ഞുകഴിഞ്ഞു. കേരളത്തിലാകട്ടെ മൂന്നുവർഷമായി ഭരിക്കുന്ന ഇടതുപക്ഷ സർക്കാരിന് ഒന്നും ചെയ്യാനായില്ല. ഓഖിയിലായാലും പ്രളയാനന്തര പുനർനിർമാണത്തിലായാലും സർക്കാർ പരാജയമായിരുന്നു. ജനങ്ങളെ മുഖ്യമന്ത്രി കബളിപ്പിച്ചു.

രാഷ്ട്രീയകൊലപാതകങ്ങളിൽ യുവാക്കളായ മൂന്നു കോൺഗ്രസ് പ്രവർത്തകർ കൊല്ലപ്പെട്ടു. കൊലപാതകക്കേസുകളിലെ യഥാർഥ പ്രതികളെ രക്ഷിക്കാനാണ് സി.ബി.ഐ. അന്വേഷണത്തിന് സർക്കാർ തയ്യാറാകാത്തത്. ചുരുക്കത്തിൽ കേന്ദ്ര-സംസ്ഥാന സർക്കാരുകൾക്ക് സ്വന്തം താത്പര്യങ്ങൾ സംരക്ഷിക്കാനാണ് താത്പര്യം. ഇടതുമുന്നണിക്ക് വോട്ടു ചെയ്തിട്ട് കാര്യമെന്തെന്ന ചോദ്യം ഉയർന്നിട്ടുണ്ട്. ശരിയാണ്, ഈ തിരഞ്ഞടുപ്പിൽ അവർക്കെന്താണ് റോൾ? അവരുടെ പ്രധാനമന്ത്രി ആരാണ്? തിരഞ്ഞടുപ്പിൽ അവർ മുന്നോട്ടുവയ്ക്കുന്ന പരിപാടിയെന്താണ്?

മോദിയെ പുറത്താക്കുക ലക്ഷ്യം

മോദിഭരണം അവസാനിപ്പിക്കുകയെന്നതാണ് കോൺഗ്രസിന്റെയും മതേതര ജനാധിപത്യ വിശ്വാസികളുടെയും ലക്ഷ്യം. അതിന്‌ സഹായകരമായ നിലപാടല്ല കേരളത്തിൽ ഇടതുമുന്നണിക്ക്. കോൺഗ്രസ് അല്ലാതെ മോദിയുടെ രണ്ടാംവരവിനെ ആരു തടയും? കേന്ദ്രത്തിൽ മോദിയെ പുറത്താക്കാൻ രാഹുൽഗാന്ധിയുടെ നേതൃത്വത്തിലുള്ള കോൺഗ്രസിനേ കഴിയൂ. പക്ഷേ, വയനാട്ടിൽ രാഹുൽ മത്സരിക്കുന്നതിനെ എതിർക്കുന്നത് ഇടതുമുന്നണിയും ബി.ജെ.പി.യുമാണ്. ഇരുവർക്കും ഒരേ സ്വരം. വയനാട്ടിൽ ഇടതുമുന്നണിയുടെ സ്ഥാനാർഥിയെ പിൻവലിക്കുകയാണ് വേണ്ടിയിരുന്നത്. അതുചെയ്യാതെ എന്തിനാണവർ രാഹുലിനെ തോൽപ്പിക്കാൻ ശ്രമിക്കുന്നതെന്നറിയില്ല. രാഹുലിന്റെ വരവ് കേരളരാഷ്ട്രീയത്തിൽ ഗുണകരമായ മാറ്റം ഉണ്ടാക്കും.

ശബരിമലയുടെ പേരിൽ മുതലക്കണ്ണീർ

മുസ്‍ലിം ലീഗ് വർഗീയപ്പാർട്ടിയാണെന്ന പ്രചാരണം വർഗീയ ചേരിതിരിവ് ഉദ്ദേശിച്ചാണ് എന്നതിൽ സംശയമില്ല. ലീഗ് മതേതര പാർട്ടിയാണ്. ബാബറി മസ്ജിദ് തകർക്കപ്പട്ടപ്പോൾ നാട്ടിൽ സമാധാനത്തിനുള്ള നിലപാടാണ് അവരെടുത്തത്.

ശബരിമലയുടെപേരിൽ പ്രധാനമന്ത്രി നരേന്ദ്രമോദിയും ബി.ജെ.പി. അധ്യക്ഷൻ അമിത് ഷായും ഒഴുക്കുന്നത് മുതലക്കണ്ണീരാണ്. അധികാരത്തിലിരുന്നപ്പോൾ ഒന്നും ചെയ്യാതെ തിരഞ്ഞെടുപ്പ് അടുത്തപ്പോൾ വിശ്വാസസംരക്ഷണവുമായി രംഗത്തിറങ്ങിയത് നാടകമാണ്. കേരളത്തിൽ വർഗീയധ്രുവീകരണത്തിനാണ് ബി.ജെ.പി. ശ്രമിച്ചത്. മർക്കടമുഷ്ടിയും ധിക്കാരവുംകൊണ്ട് മുഖ്യമന്ത്രി അതിന്റെ ആഴംകൂട്ടുകയും ചെയ്തു.

Content Highlights: loksabha election 2019, interview with ramesh chennithala