ഫോട്ടോ: സാബു സ്‌കറിയ
ഇന്ത്യയില്‍ വ്യാപകമാകുന്ന ഇലക്ട്രിക് വാഹനനിരയിലേക്ക് കിയ മോട്ടോഴ്‌സും എത്തുന്നു. വിദേശ നിരത്തുകളില്‍ എത്തിയിട്ടുള്ള സോള്‍ എന്ന ക്രോസ് ഓവര്‍ മോഡലാണ് ഇന്ത്യയില്‍ ഇലക്ട്രിക് കരുത്തില്‍ പിറക്കുന്നത്. ഒറ്റത്തവണ ചാര്‍ജ് ചെയ്താല്‍ 450 കിലോമീറ്റര്‍ റേഞ്ചുമായാണ് ഈ വാഹനം ഇന്ത്യയിലെത്തുന്നത്.
ഇന്ത്യയിലേക്കുള്ള വരവറിയിച്ച് കിയ സോള്‍ ഇലക്ട്രിക് ഡല്‍ഹി ഓട്ടോ എക്‌സ്‌പോയില്‍ പ്രദര്‍ശനത്തിനെത്തി. കാഴ്ചയില്‍ ഒരു എസ്‌യുവിയുടെ തലയെടുപ്പുള്ള സോളില്‍ 198 ബിഎച്ച്പി പവറും 395 എന്‍എം ടോര്‍ക്കും ഉത്പാദിപ്പിക്കുന്ന ഇലക്ട്രിക് മോട്ടോറാണ് പ്രവര്‍ത്തിക്കുകയെന്നാണ് സൂചനകള്‍.
സ്പോര്‍ട്ടി ഭാവങ്ങള്‍ നല്‍കി ബോക്സി ഡിസൈനില്‍ ഒരുങ്ങിയിട്ടുള്ള വാഹനമാണ് സോള്‍. നേര്‍ത്ത ഗ്രില്ല്, എല്‍ഇഡി ഹെഡ്ലാമ്പ്, മസ്‌കുലര്‍ ബമ്പര്‍, ബമ്പറില്‍ സ്ഥാനംപിടിച്ചിട്ടുള്ള ഡിആര്‍എല്‍, 17 ഇഞ്ച് അലോയി വീല്‍, സ്റ്റൈലിഷ് ടെയ്ല്‍ലാമ്പ് എന്നിവ ചേര്‍ന്നതാണ് സോളിന്റെ പുറംഭാഗം.
ബ്ലാക്ക്-ബേജ് നിറങ്ങളിലാണ് ഇന്റീരിയര്‍. 10.25 ഇഞ്ച് ഇന്‍ഫോടെയ്ന്‍മെന്റ് സിസ്റ്റം, ലെതര്‍ ഫിനീഷിങ്ങ് ഡാഷ്ബോര്‍ഡ്, ഡിജിറ്റല്‍ ഇന്‍സ്ട്രുമെന്റ് കണ്‍സോള്‍, ഓട്ടോമാറ്റിക് ക്ലൈമറ്റ് കണ്‍ട്രോള്‍, ഹീറ്റഡ് സീറ്റ് എന്നിവയാണ് ഇന്റീരിയറിലെ ഫീച്ചറുകള്‍.
2025-ഓടെ 16 ഇലക്ട്രിക് കാറുകള്‍ ഇന്ത്യന്‍ നിരത്തിലെത്തിക്കുമെന്നാണ് കിയ ഉറപ്പുനല്‍കിയിരിക്കുന്നത്. ഇതിന് പുറമെ, സോള്‍ ഇലക്ട്രിക്കല്‍ കാറിന്റെ ഓട്ടോണമസ് വാഹനത്തിന്റെ നിര്‍മാണവും കമ്പനിയുടെ പരിഗണനയിലുണ്ട്.
Content Highlights: Kia Soul Electrical Showcased At Delhi Auto Expo 2020
RELATED STORIES
IN CASE YOU MISSED IT
